Feast (Food by EAST)

28 January 2012, Saturday

轉咗iPhone之後, 終於有得用Whatsapp啦!!!

最大嘅收穫, 應該係比一個好耐冇聯絡嘅老友係Wahtsapp搵到我... 原來佢轉咗電話號碼, 唔怪得我Send SMS比佢好似冇反應咁啦...

都有2-3年冇見, 所以要搵個坐得耐嘅地方慢慢傾... 臨急臨忙都唔知去邊樹搵, 只係唸到太古城「東隅」酒店, 順利Book咗位食Tea Buffet!!! 由3:00PM食到5:30PM, 都只係138蚊加一, 咁抵嘅?!!

行緊去酒店時見到有一家幾口嘅外籍人士, 人人手上都拎住一支窩夫, 好似幾吸引喎... 所以入到去我又要食一支... 掛住傾計, 都唔為意原來D生果要自己加, 結果食咗支齋窩夫... 我覺得係合桃味...

上次食唔到嘅Tiramisu, 都幾好味, 幾滑... 士多啤梨卷酸酸地, 幾醒胃... Cupcake最正係幫你Cut好晒做半件, 唔使攪到食1件就飽晒... 朱古力Cupcake都幾好味...

個雞肉包最好味, 芝士包都好好味...

Pizza同埋呢幾件包包都唔錯...

生果幾甜... 麵包布丁同Cream Brulee都係So So...

每人1客嘅朱古力心太軟就有酒店水準喇!!! 剩係睇個賣相都知好得!!! 濃郁嘅朱古力味, 配杏脯雪芭, 好新穎嘅配搭...
每人仲有1杯咖啡或茶...

我地由3點正坐到6點幾, 坐到Dinner Buffet都開始咗, 見D人夾緊生蠔... 服務員冇開聲趕我地走, 不過就開始幾個一齊圍住我地張枱行行企企... 得得得, 我地明, 走人!!! 真係唔好意思, 太耐冇見, 真係講幾日幾夜都講唔完... 結果落到地鐵站又再傾多1粒鐘先肯散水...

食物整體唔係太多選擇, 不過件件都幾好味, 而且人客唔多, 好清靜吓, 同朋友吹水一流...

是次每人消費約$150元
味道： 4 環境： 4 服務： 4 衛生： 5 抵食： 4
###
地址 : 太古太古城道29號東隅1樓
電話 : 3968 3777