丼丼屋食堂 Dondonya Shokudo

9 January 2012, Monday
只係開咗一個星期左右嘅「丼丼屋」, 好早就坐滿人, 如果過咗7pm先o黎, 直頭大排長龍添呀!!! 見到咁多人食緊, 我地又忍唔住去八埋一份...

晨咁早, 餐廳入面嘅卡位已經冇晒, 得番餐廳中間呢個面壁位... 嘩!!! 個燈箱使唔使咁殘眼呀?!! 根本冇辦法mark大對眼!!! 見到附近有食客帶住鴨嘴帽食, 真係佩服佢, 有備而o黎!!! 我最後要放個ipad袋再加個餐牌係面前, 遮住d光, 再用左手遮住對眼, 剩係用右手進食, lala聲食完lala聲走人, 真係「食而不知其味」!!! 究竟個designer知唔知咩叫「光害」?!! 使唔使光到咁呀?!!


咖喱吉列豬柳飯--咖哩汁少得可憐, 根本唔足以撈晒碟白飯, 加咖哩汁居然要加25蚊?!! 唔係呀嘛?!! 搶錢呀?!! 同埋個汁係似吉豬島10元店果d叮叮咖哩汁囉, 人地加咗價之後, 都係12蚊1包咋喎... 個豬柳都唔得, 好乾好硬, 一d都唔juicy, 我已經係特登要貴幾蚊嘅豬柳, 因為怕豬扒整得唔好的話會又乾又硬, 點知都係咁...

汁燒牛扒丼--honey嘅牛肉飯係另外加錢轉定食, d沙律都ok新鮮, d牛肉話7成熟, 不過唔太熟, honey就叫服務員叫廚房整熟少少, 結果我食完個咖哩飯, 個牛肉飯都仲係失咗蹤, 問咗多個服務員之後, 終於有1個同我地講「因為要重新整過, 所以會耐d」... 嘩!!! 咁嚴謹?!! 再等多一陣, 終於有得食, 味道都唔錯, 牛肉份量都好多...

埋單係大戶屋咁嘅價錢, 但係我覺得大戶屋好味d同埋份量大d, 所以決定都係繼續幫襯番大戶屋, 呢間試過就算, 間唔中食吓都無妨, 但係我一定一定一定唔會再坐呢個「光害」位囉!!!

是次每人消費約$95元
味道： 3 環境： 3 服務： 4 衛生： 4 抵食： 2
###
地址 : 太古太古城道18號太古城中心1樓102號鋪
電話 : 2164 8636