龍景軒 Lung Keen Hing

27 September 2011, Tuesday

「龍景軒」... 自從米芝蓮登陸香江, 至今連續3年榮獲米芝蓮三星評級, 咁堅?!! Honey同我當然唔可以錯過啦...

試過即日打去Book位, 冇位好正常... 又試過幾日前Book, 都係冇位... 又試過一星期前Book, 都仲係冇位... 結果... 索性個半月前Book, 終於Book到位喇!!!

11:55AM去到, 服務員話未夠鐘, 叫我地響門口等陣... 咁我地乖乖地咁係門口等啦... 心諗:「吓?!! 仲差5分鐘咋喎?!! 唔使咁準時吖?!! 入去坐陣都得啩...」

WoW... 係大家都想坐嘅窗口位呀!!! 望到成個維港o架!!! 可惜有颱風o黎緊香港, 成個維港被濃郁嘅煙霞籠罩住, 朦咗少少, 如果好天, 應該會好靚...

餐廳色調以啡色為主, 餐枱與餐枱之間有一定距離, 座椅好舒適, 商務客佔一半...

出發前已經上網調查定有咩好食... 鎖定咗幾個目標, 不過去到有少少變咗, 可能某D食物唔當造啩...

大家一致好評嘅茶芥, 中間嘅梅菜豬肉醬真係好好食, 從未諗過梅菜豬肉可以做醬... 右邊嘅XO醬都好得... 左邊嘅辣椒豉油一般啦...

原隻鮑魚雞粒酥--招牌菜... 坦白講... 鮑魚冇味嘅, 又細粒... 雞粒都冇特別驚喜... 個酥反而幾脆...

龍帶玉梨香--招牌菜... 第一粒係苦嘅同埋冇味, 之後逐隻汁試吓味, 最夾係檸檬汁, 可以帶出帶子同蝦膠嘅鮮甜味... 之後食到最尾個粒, D梨又甜到漏, 我估第一粒可能切得太近個梨嘅芯...

孜然羊肉燒餅--唔覺網上有人提過, 但係竟然有驚喜!!! 咬開出晒煙, 好熱吓... 勁重羊味, 好正呀!!!

飄香荷葉飯--飯濕淋淋嘅, 荷葉味欠奉, 味道鹹咗D...

桂花杞子糕(送)--桂花杞子糕D味... 唔係平時食開嘅桂花味... 但係好熟... 嗯... 嗯... 係「蘿蔔神」啫喱!!! 應該係溝得好淡嘅士多啤梨味!!! 連Honey都贊同我嘅講法... 我地對呢個桂花杞子糕除咗O咀之外, 已經冇其他o野可以講...
芝麻餅(送)--去飲果D食剩晒嘅美點雙輝嘅質數...

服務員有Keep住幫我地斟茶, 唔該晒...

食完晒Honey有叫我揀多1-2樣點心, 我竟然冇Mood揀囉, 最後揀來揀去都唔想再食, 咁嘅情況實在前所未見... 上次去尖沙咀福臨門我係幹掉完3 Round都仲想再叫o野食o架...

食完呢餐之後充滿疑問... 佢個三粒米芝蓮星星, 當佢一粒星係環境, 一粒星係服務, 咁到底第三粒係邊樹o黎??? 味道??? No Way!!! 除咗失望, 已經諗唔到第二個形容詞...

我地一定要去添好運試吓, 要我係街排幾粒鐘都係咁話, 睇吓D味道係咪走咗去果便!!!

是次每人消費約$255元
味道： 3 環境： 5 服務： 5 衛生： 5 抵食： 1
###
地址 : 中環金融街8號四季酒店4樓
電話 : 3196 8880