「懷舊香港情」微型藝術展 In Retrospect : HK Zoomed in Miniature Exhibition

2 July 2011, Saturday

尋日路過太古城中心, 發現佢擺緊「懷舊香港情」微型藝術展, 超多人, 好想入去睇, 可惜冇帶相機... 今日晨咁早帶晒大細機去...

未夠10:30AM, 係外圍影下相先...


有記者採訪緊今次展覽嘅其中一位藝術家...

開場唔夠10分鐘, D人已經迫爆展覽場地... 不停聽到唔同嘅人狂打電話CALL D親友o黎睇...

個人認為, 呢個士多最迫真, 最為俏為妙...

呢個髮廊都勁迫真...

呢間士多都唔錯...

呢個走鬼檔飯店都得到不得了... 不過唔係幾合衛生, 生熟食物堆埋一堆囡...

呢個茶樓充滿高貴嘅氣質...

冇得傾, 呢個鞋鋪都迫真到爆...

老街景迫真程度90%... 地下差咁D垃圾, 冇理由咁乾淨, 除非垃圾蟲去咗罷工...

比一底雞蛋仔吖, 再要多一串魚蛋, 多D甜醬吖, 唔該...

D臘腸激似...

豆腐鋪同雜貨鋪都似到不得了...

呢個鄉村士多差咗張麻雀枱喎... 唐樓走廊地下果灘水簡直畫龍點睛...

糖水檔其實都好似, 不過因為太陽伯伯唔肯合作, 所以影得麻麻地... 雜貨鋪都激似, 但太多人, 點霸都霸唔到好位...

呢個展覽好值得睇!!! 記得之前果晚早D瞓, 因為少D眼力都睇唔掂...

我啱啱開始上咗2堂「微型公仔屋--迷你店舖(糖果、朱古力)」, 2星期整咗300粒微型朱古力, 已經攰到嘔, 直頭覺得有50肩症狀, 辛苦死... HONEY今日睇完呢個展覽, 已經話覺得一間鋪仔最少都要整大半先起到貨, 仲難過開間真鋪... 聽完我更加想死... 仲有8堂, 點挨...

### 展覽詳情 ###

太古城中心「懷舊香港情」微型藝術展
16位傑出微型雕塑藝術家「再造」出昔日香港，展出共42件似曾相識的微型街景模型，帶您回到過去。

日期 : 30/6-17/7/2011
時間 : 上午10時30分至晚上9時30分
地點 : 太古城中心 2 樓 中橋 http://www.cityplaza.com.hk/chi/hot_promotions/coming_attraction_items/4.htm