合時小廚 Hop Sze Restaurant

4 July 2011,  Monday

幾個月前有個Friend極力推介一間位於西灣河嘅小店嘅「生炒骨」, 不過又講唔出店名, 所以我都無從入手...

上個月再見到佢, 佢繼續激讚, 仲拎咗幾張小店嘅卡片大派, 哦... 合時小廚... 個Friend仲教埋我邊幾個菜必點...

今日去開西灣河, 一心諗住試下呢個令佢讚不絕口嘅「生炒骨」, 點知... 原來要預訂先有得食o架... Oh No... (有其他食客o黎試食都係點生炒骨, 同我一齊撲空)

跟手Order個Friend話幾好嘅「豉油皇浸雞」, 點知又係要預訂!!! 好彩另外一個店員話有半隻, 我估有客訂咗半隻, 所以我先有得食... 好彩好彩...  (遲我小小o黎果個試食客人又係點豉油皇浸雞, 店員解釋唔預訂的話, 落單後要等45分鐘先有得食, 示意個試食客改ORDER其他食物... 今次我有得食啦, 果個試食客就2樣都撲空, 呵呵呵呵)

原來係咁嘅... 唔怪得之... 餐牌係搵唔到生炒骨同豉油皇浸雞啦~

酸菜--好好味喎, 脆脆地, 微酸, 好開胃...

冬瓜瑤柱燉花菇--嘩!!! 舊花菇好大舊呀!!! 個湯都幾清甜, 係唔多見D瑤柱啫...

啫啫唐生菜煲--嘩!!! 好香呀!!! 好夠蝦醬味呀!!! 仲好夠份量呀!!! 正呀!!! 不過... 食個時發現有好大隻蚊LAY咗係菜頭隱蔽位, 即時打個折扣...

豉油皇浸雞(半隻)--聽BLOG友講呢度係用香港新鮮農場雞, 唔知真定假... 不過半隻雞仲大過平時食開一隻雞, 仲要平時對雞冇咩研究嘅我地, 都一啖食得出D雞肉好食過平時D雞, D肉彈牙D同埋D皮冇咁多肥膏... 味道就... 豉油唔太夠, 麻油味反而好重... 呀)))))) 我最憎食麻油o架!!!!!! 我私人覺得好難食, 但係我估其他人會覺得好好食...

紫糯米糖水(送)--唔太甜, OK GOOD啦~

小店環境比想像中好, 樓面算企理, 小館式經營, 樓面有7張枱, 我冇上去角樓睇, 唔知角樓有幾大...

服務就一般, 樓面得3個人, 3個人應付晒樓面同角樓, 出菜收錢落單一腳踢...

女厠其實個裝修算係新淨, 可惜地下有積水, 仲要冇水沖厠, 放咗個鋁盤係洗手盤等用家自行打水沖厠...

今餐唔覺得特別好食, 下次要打定電話o黎Order定傳說中嘅美味「生炒骨」先得~

是次每人消費約$125元
味道： 3 環境： 2 服務： 2 衛生： 2 抵食： 2
###
地址 : 西灣河筲箕灣道39號麗灣大廈地下
電話 : 2569 0862