鴻星海鮮酒家 Super Star Seafood Restaurant

30 April 2011, Saturday

下星期日就係母親節, 我兩個英明嘅家姐一早就話提早D食飯慶祝, 唔使"迫餐死 + 勞餐死 + 趕餐死 + 貴餐死", 真係幾十年都唔覺佢地咁有頭腦, 哈哈...

乳豬(半隻)--雖然點睇都冇半隻, 不過主角"媽大人"大讚D皮好脆", 咁... 都值得嘅!!! 仲要隻豬又唔肥, 兼且有D肉食下, 仲幾好味添... 唔嫌呢十一片乳豬要二佰幾蚊嘅, 絕對可以一試~

沙薑雞(半隻)--都係果句, 點睇都冇半隻, 不過今晚個個心情大靚, 竟然冇人生事, 嘿... 真神奇!!! 隻雞味道都OK嘅~

炭燒片皮鴨--第一次見片皮鴨上埋對鴨脾, 抵讚!!! D鴨皮一D都唔肥, GOOD!!!

涼瓜炆片皮鴨(兩食)--都幾得喎, 炆得好入味, 仲要一D都唔肥喎, 抵讚~

上湯波士頓龍蝦伊麵--雖然隻龍蝦就細咗D, 不過今晚氣氛出奇地好, 大家都冇咩COMPLAINT... 伊麵真係冇咩機會掂到, 皆因2個姪女荷葉飯都唔食, 堅持要等食呢個伊麵, 仲點敢同佢地爭~

南瓜蟹煲--D南瓜好好味喎!!! 蟹我就唔敢掂啦, D皮膚都仲未好番~

涼瓜炒牛肉--呢碟餸... 竟然牛肉多過涼瓜?!!! 但我地就笑住同部長反映, 我家姐仲問佢係咪加多D涼瓜比我地, 個部長呆咗問點加, 跟手我地叫佢放個生嘅涼瓜上枱比我地得架啦~ 嘩咔咔咔~ 部長遇著我地呢枱瘋人, 無言以對~

蝦醬通菜--好得喎, 得到佢地食完又再ORDER多一個!!!

荷葉飯--D飯比較濕同淋, 當然唔及福臨門好食架啦, 之但係價錢係福臨門嘅一半, 都唔可以有太大要求~

飲埋幾支汽水同楊枝金露, 再送紅豆沙, 扣埋張$200 COUPON, 16個人先$15XX, 嘩, 有冇可能咁抵呀?!!!

扣埋我地有4個細路, 2個練仙嘅大人, 都仲有10個人, 圍起都係$160一個, 真係好抵!!!

部長全程緊貼我地張枱, 其他職員都態度良好, 主角"媽大人"又讚D野好食, 令到今晚餐飯嘅氣氛好好!!! (以往正日前後慶祝都幾勞氣)

8點3要還枱, 見咁早, 成家人一齊迫入冒險樂園, 幾個細路都有斬勞, 利害!!!

是次每人消費約$100元
味道： 4 環境： 4 服務： 4 衛生： 4 抵食： 5
###
地址 : 旺角太子道西193號新世紀廣場8樓801號舖
電話 : 2628 0890