Olala [少林食神の推介(二)]

29 November 2010, Monday

上次同Honey嘅朋友--少林食神一齊去桃花源小廚 Tim's Kitchen享受完《2010米芝蓮指南》(Michelin Guide)嘅二星食肆招牌菜之後, 今日少林食神又再有好介紹...

去到又係唔使睇餐牌就落Order, 由於佢係熟客, 所以都幾好Service... 埋單時老闆仲走出黎同佢嗲幾句... 聽聞老闆好有性格, 曾經趕過客, 所以係某開飯網站俾人抺黑, 搞到評分好低...

餐廳內佈置簡約, 只係掛咗幾幅畫... 其中一幅係呢隻肥DoDo嘅豬... 大家一定要認住呢隻豬... 佢係西班牙黑豬(Iberico), 專食橡果... Jamon Iberico de Bellota係火腿中嘅極品...

註: Iberico指黑腳豬，豬腳呈黑色，當中分成4個級數，由頂級至低級順次為Iberico de Bellota D.O.、Iberico de Bellota、Iberico de Recebo、Iberico de Cebo。

花園嘅聖誕蘑菇好Kawaii呀~ 全晚只得3枱客, 大家各據一方, 私隱度極高...

Baguette 脆法包--呢個餐前麵包係自家制嘅, 個包暖暖地, 可以伴牛油或者豬肉醬一齊食... 牛油好香, 豬肉醬好似豬肉鬆咁, 好好味, 我食咗2大件...

Jamon Iberico de Bellota 風乾黑腳豬火腿--風乾火腿中嘅極品, 同平時食到嘅意大利白豬火腿Parma Ham唔同, 唔使同生菓一齊食, 就咁放入口, 味道係鹹鹹地, 唔太油, 好軟滑, 仲好有肉味... 鐘意食嘅朋友, 仲可以係OLALA附設嘅專門店買番屋企慢慢嘆...

Croissants 牛角酥--自家新鮮焗制, 真係超超超超超好食... 好鬆化, 又唔會硬繃繃, 仲好香好香, 從未食過咁好味嘅牛角包... 雖然好巨型, 要用2隻手拎住黎食, 但係我都Jeep Jeep聲食晒, 如果個胃仲有位, 真係想再食多幾個...

Figs and garden greens salad 無花果沙律--老闆係法國有自己嘅莊園, 自家種植無花果, 乾蕃茄都係自家制... 糖芯無花果好香好甜, 真係未食過咁好食嘅無花果... 乾蕃茄我覺得鹹咗小小, 不過Honey覺得好好食... 沙律好新鮮, 味道一流...

法式洋蔥湯--牛骨湯底, 加咗蒜, 芝士同麵包粒自己鐘意加幾多就幾多... 好濃郁好好味...

磨菇湯--加咗火腿碎, Honey話味道OK...

法國野生龍脷魚(約800g)--法國入口, 中式煮法... 肥美肉厚, 魚肉非常之結實, 又唔嚡, 好新鮮, 仲有白飯比我地撈o黎食, 太好味, 攪到我食咗好多, 剩係食佢都飽晒... 不過唔係成日有得食o架, 由於係野生, 需要靠人手捕捉, 捉到先有得食...

燒豬肋骨--燒得香脆之餘又好鬆軟Juicy, 可以點D海鹽一齊食, Yummy!!! 伴菜香草薯蓉都好好味, 不過食咗太多魚太飽, 食唔晒D薯蓉, 有小小浪費...

Honey同少林食神一邊享用美食一邊嘆紅酒, 佢地個樣真係超享受... 我囉喎, 都有Vittel礦泉水飲下嘅...

餐廳嘅卡片同濕紙巾都印咗老闆嘅卡通肖像, 好搞笑...

係網上見到D BLOG友話呢個老闆之前係經營Le Fauchon... 咦... 個名點解好似好熟... 睇番自己D BLOG, 原來2006年11月同E4食過o架... 應該係 Brasserie Le Fauchon... 估唔到我D朋友一早都咁識食o架啦喎... 哈哈哈...

由於Honey的好友請客, 所以今餐嘅價錢都係估估下... 火腿大約400-500蚊, 魚就大約800蚊, 豬肋骨就200蚊左右, 成餐食咗2千幾, 都算係我人生中最貴嘅一餐... 暫時...

是次每人消費約$700-900元
味道： 5 環境： 4 服務：4 衛生： 4 抵食： 3
###
地址 : 灣仔電氣街1號地下
電話 : 2294 0450