Mr. Taco Truck

17 September 2010, Friday

今日LUNCH HOUR見悶悶地, 唔叫外賣, 落街買野食順便行下... 行行下見到呢間開咗1年嘅墨西哥快餐勁多人, 鋪仔細細坐咗接近20人... 講真, 佢開張時我見佢放得2張企枱, 冇諗過可以坐到咁多人, 諗住佢都係主力做外賣生意嘅啫... 大熱天氣D人都肯坐係街度, 唔通真係咁好食???

我買咗1個"墨西哥手卷套餐" (Burrito Combo)... 包一款墨西哥手卷(自選肉類或素), 粟米脆片配莎莎醬 (Tortilla Chips with Salsa), 細汽水... 嘩... 大拿拿59蚊都咁多人食??? 唔通真係好好食???

自選肉類有燒汁雞脾肉, 燒牛肉粒, 烤豬肉, 香汁豬柳... 我揀咗烤豬肉...

汽水有可口可樂, 健怡可樂, 雪碧, 梳打水... 我揀咗梳打水...

墨西哥手卷係用麵粉薄餅包住墨西哥飯, 班豆蓉, 芫茜, 洋蔥粒, 莎莎醬... 坦白講, 我見到佢竟然叮個墨西哥手卷個一刻, 個心已經涼一涼, 咁貴嘅食物, 竟然係叮出黎嘅??? 再者, 墨西哥飯原來係茄汁飯, 可惜冇茄汁味, 仲要淋BEAR BEAR...
食唔出有班豆蓉, 幾蚊1大包嘅雪藏青豆就見到幾粒...
更唔覺有莎莎醬係入面...
個烤豬肉好似乾柴咁, 冇味嘅...

粟米脆片油淋淋, 雖然個莎莎醬幾治味, 但食咗3份1都唔想再食...

梳打水比蒸餾水更清純...

又貴又唔好食又坐得唔舒服, 究竟點解可以有咁多人去食架??? 仲有好多唔同國籍嘅人食緊同排緊隊...

數月前有一日放工見到盧覓雪係入面拍攝緊, 可能好快就會出街, 大家可以留意下...

是次每人消費約$60元
味道： 1 環境： 1 服務： 2 衛生： 1 抵食： 1
###
地址 : 鰂魚涌芬尼街22號海暉大廈地下E舖
電話 : 2590 6911