上星期六(2008年11月22日)係11月之星嘅大日子... 我同貓兄事前去咗灣仔行下建材街先... 個buffet可以由1pm食到6pm, 唔使趕頭趕命, 又大把時間傾計...
一坐低先食一輪冷盤... 三文魚刺身同煙三文魚都唔錯...
之後就攻Organic Food... 估唔到朱古力最好味, 另外當然唔小得我至愛嘅車厘茄配羊奶芝士啦...
再攻杯裝haagen-dazs雪糕... 食多幾杯嘅話真係咩本都返番晒o黎...
跟手o黎一轉甜品... 燕窩蛋白tart好多燕窩, 朱古力cake好味, 個strawberry批最好食, 最難食係杯白桃jelly...
休息一陣就食芝士, 除咗吞唔落blue cheese之外, 全部cheese都好正...
暈妮最勇, 咁大碗生滾粥都夠胆拎, 比咗幾啖我地試, 又真係幾好味喎衰鬼...
DD拎咗朱古力cake同strawberry macaroon都話甜過龍, 叫我試下味, 我又唔覺得好甜喎, 仲比佢笑我味蕾有問題添呀... 哈哈哈哈...
飲埋2杯special drink之後, 已經飽到想嘔, 早知唔飲西瓜個杯, 又唔好飲又頂實個胃, 但係綠茶個杯就勁正, 必試...
被迫坐在酒吧區, 原先已經坐得好唔舒服, 之後坐坐下仲熄燈, 攪到黑麻麻咩胃口都冇晒, 仲要開到d音樂鬼咁嘈, 傾計傾到喉嚨痛...
是次每人消費約$215元
味道： 4 環境： 2 服務：3 衛生： 4 抵食： 3
###
地址 : 金鐘金鐘道88號太古廣場香港JW萬豪酒店大堂
電話 : 2841 3846 / 2841 3836
多謝晒 ! 我非常滿足.... 勁食魚生
回覆刪除最衰冇得去 sogo
[版主回覆11/29/2008 12:18:00] 好似係某人趕住走先去唔到sogo喳喎...
原來當日黎生與林雲X及何文X 一起食飯喎, 當日是否宜 gather la !
回覆刪除[版主回覆11/29/2008 12:16:00]哈哈... 係咩... 不過蘇師傅話 Last Friday同 Last Sunday 先宜會友喎...
Mr. So 是否萛錯 ?!!!!!
回覆刪除邊個某人咁衰, 拿佢出來 ................. 打 !!!!!!!!!
回覆刪除[版主回覆11/29/2008 21:48:00] 你試下搵杯水望下, 又或者裝d水落洗碗盤望下...
如果坐得舒服D，可以再食多D，D野食都唔錯，可惜我有好多都唔可以食！
回覆刪除[版主回覆11/30/2008 00:08:00]我都有同感, 而家好後悔當時冇同佢博命... 佢一熄燈, 我就即刻睡魔急call咁, 仲點食得落o野喎, 嗚嗚...
最衰飽到死時才食鬆餅,而家好想再食呀,仲有我訂左yamm dinner buffet啦,29/12好期待
回覆刪除直頭啦，邊個同邊個都話走，攪到一埋單全世界都走清， 我仲以為休息一陣可以繼續搏命…
回覆刪除其實坐酒吧都好架，回氣時坐得舒服啲！