又8號風球? 今年第4個8號風球啦喎!!! (颱風黑格比)

尋晚(2008年9月23日)放工可謂險象環生... 個風咁Q遠, 完全冇心理準備會掛8號, 雖然我已經一早開定收音機... (自從上年天文台網頁癱瘓, Inti提到可以上網聽收音機, 我先發現公司個HiFi係有收音機, 嘩哈哈哈)

我D同事, 夠鐘放工都唔走, 要我趕先至肯走...
攪到我走果陣, 已經8號, 條街冇晒Taxi, 平時行去太古坊條路D樹已經吹斷左, 望過去... 個Feel係"入得o黎, 冇咁易出番去"個隻(廸士尼黑色世界Slogan)!!!
一出停車場, 開遮即刻吹斷咗把遮...

 企定定都會比D風吹到打橫行...

風大雨大... 要係條英皇道度喪跑... 好彩冇上TVB News喳...
最慘係英皇道有地盤, 跑個陣要用手按住個頭, 驚有o野跌落黎... 個樣勁狼狽...
千辛萬苦閃到入MTR個陣, 已經成身濕晒, 但係都仲要坐一個站返太古... 已經冇Mood再去太古城大吃大喝... 唯有食D快餐就拿拿聲返歸...
我地新公司係海邊, 附近完全冇building保護, 好食風, 好多年冇試過咁有打風嘅Feel, 真係人都癲!!! 下次天文台再話2小時內掛嘅話, 我一定第一時間鬆人, 以免慘劇重演!!!