橋底辣蟹 Qiao Tei Chili Crab

尋晚(2008年3月6日)我同早兄特登走咗去銅鑼灣, 皆因"撕旗"牛仔服大特賣第一天, 話咩低至1折喎... 咁抵, 緊係要去八下啦... 點知去到個陣, 見到條龍長過有米派, 心諗 : "唉, 都要照排o架", 只可惜... 有位職員小姐不停重覆叫喊"截咗龍o架啦, 今日唔可以再排o架啦!!!"... 吓, 唔係呀嘛, 我地特登搭車o黎過喎... 任務1--失敗!!!

 

咁我地即刻爭取時間走去鵝頸橋... 因為3月5日係驚蟄, 尋日d報紙大肆報導"打小人"實況, 我地當然要去現場了解下... 雖然我地身邊都有d小人, 但係都未至於要出動到呢種終極武器o黎還拖... 任務2--失敗!!!

 

去銅鑼灣嘅3個任務, 頭2個已經失敗咗, 第3個不容有失...

 

æ橋底辣蟹(細)--好大碟呀, 咁中size咪仲大隻... 我地叫咗微辣, 不過一d辣味都冇... 蟹肉勁鮮味呀, 啖啖肉, 好好味呀...

æ你睇隻蟹鉗幾大...

æ椒鹽瀨尿蝦--好好味呀... d瀨尿蝦肉好有(十幾年前先食到嘅)瀨尿蝦味呀... 好耐之前試過跑馬地銖記, 一樣咁大隻咁新鮮, 但係就欠缺個種十幾年前先食到嘅瀨尿蝦味...

æ蟹油炒麵--連唔鍾意食麵嘅我都可以食幾碗呀

食完o野仲有甜品送, 今次係紅豆沙, 唔太甜又多沙, 都唔錯!

 

拉姑誠意推介比所有鐘意食蟹同瀨尿蝦嘅朋友!!! 不過去個時要小心, 因為有好多間同名嘅店舖, 一定要去橋底下面個間先係正貨!!!

 

是次每人消費約$240元
味道： 4.5 環境： 3 服務： 3 衛生： 2 抵食： 3

戰鬥指數

###

地址 : 灣仔駱克道 429 號 6-9 號舖
電話 : 2573 7698