觀松鼠之行

復活節假期嘅第一日(2007年4月5日，清明節)，我同honey見幾清涼(得16度)，雖然天陰陰，但係都去咗行山。

3:30pm先由鰂魚涌街市出發，去到紅屋循例坐低飲吓水，坐坐吓聽/見到(對到正嗰棵)樹上面d樹枝搖晃得好利害，一般雀仔係冇咁大嘅搖晃度同埋聲音嘅，當我眼定定咁睇咗陣，見到有隻動物係一條樹枝跳到另一條樹枝，再睇睇見到有條毛毛尾，直覺話比我聽呢隻係“松鼠(squirrel)”呢嘅(因為幾年前見過一次)，我即刻壓低聲線同honey講：『松鼠呀！』，honey問係邊，我指比佢睇，佢見到之後叫我攞相機比佢，我真係比佢激死--出門口時問佢帶唔帶相機但佢話唔帶，到攞手機出嚟影時隻松鼠已經走咗！

當時有位郊野公園管理員在埸，佢都落車搭訕，佢話佢坐咗係度45分鐘(泊咗架郊野公園管理車係紅屋觀鳥)先見倒2隻松鼠，我坐咗1分鐘就睇倒真係好彩！跟住佢話係“鍋輪POSE”(都唔知係乜)嗰度先最多松鼠，大家再講下雀，然後就同佢講ByeBye繼續行山。

行行下去到一個亭，嗰度貼咗d通告嘅，我估佢指嘅“鍋輪POSE”可能係呢度。跟住又聽/見到d樹枝搖晃得好利害，睇多陣，見到另一隻松鼠係d樹上面跳嚟跳去，今次可以睇耐d，睇睇下見多隻細d嘅同大嗰隻一齊玩，情況就好似阿媽接細路放學，大家鬥快跑番屋企咁。今日真係大收穫！

我唸係因為今日天陰陰，人流少，所以先見倒咁多隻松鼠，實在太好了！