富臨漁港(香港仔)

上星期日(2007年4月1日，愚人節)去咗香港仔富臨漁港飲IC的滿月酒，原本冇乜特別，但係嗰間酒樓嘅服務質素真係前所未見，高潮迭起，所以想係度同大家分享下我哋嘅奇妙經歷！

 

TO IC：請不要介意，這絕對不是投訴，而係嗰晚實在太“妙”喇，所以先想同大家分享下咁啫...

奇人奇事(1)--麻雀：

由於7點已經到達，而又未知坐邊張枱，所以諗住坐係麻雀枱唔使企咁耐！得3個人點打呀？咪係打3人麻雀囉，難唔倒我哋嘅！後尾IC介紹舊同事比我哋識，順便加入我哋嘅戰團。第一鋪鑽媽發現得16楝，何超即時指住我話：『實係拉姑多咗喇，楝牌咁長』，後尾我數過冇多，其他人再數都冇多，都大家以為走咗花時，鑽媽又發現有花，最後大家一致决定換隔籬枱副牌，呵呵呵呵... 換咗副牌之後先發覺... 之前副牌除咗唔見咗4隻之外，仲冇骰，亦冇東南西北o架！

奇人奇事(2)--換碟：
食完白灼蝦，循例換碟，但係個侍應竟然放低成叠碟，仲要我地遞自己隻碟比佢，仲要自己係叠碟度攞碟，都算喇，仲要隻隻碟都好似冇洗過咁，第一隻有蝦殼，第二隻有生菜，唉！仲一d歉意都冇，好似好理所當然咁，唉唉！

奇人奇事(3)--蟹拑：
食炸蟹拑之前，侍應竟然收走用嚟點蟹拑嘅甜酸醬，全枱即時有反應話佢做乜收咗嗰醬，可能佢(已轉身離開)係失聰嘅，所以冇理我哋！後來蟹拑嚟時，問佢攞醬佢又唔理我哋，叫部長攞醬又攞碟紅醋嚟，我哋唔肯就範佢先叫人去攞碟甜酸醬嚟，結果等到其他枱都上晒下一道菜，侍應先攞碟甜酸醬嚟，唉唉唉！

奇人奇事(4)--蟹拑：
大家都未食完蟹拑，侍應又急於上下一道菜，何超隻蟹拑食咗半隻(當時佢係用2隻手指攞住隻拑)，侍應就收走佢d碗碟，攪到何超攞住隻蟹拑都唔知點算，好尷尬，同枱嘅人都睇唔過眼，議論紛紛，何超唯有係冇碗碟嘅情況下，繼續食埋剩番嗰半隻蟹拑喇！唉唉唉唉！

奇人奇事(5)--雪碧：
到差不多尾聲時，侍應又出奇招喇！話說何超係飲緊芬達橙汁嘅，而另一位小姐係飲緊熱水嘅，個侍應竟然問佢地：『係咪飲緊雪碧？』，兩位當事人緊係答：『唔係』喇，個侍應攞住罐雪碧話：『呢隻好飲』，兩位當事人答：『唔要』，但個侍應竟然繼續放低“成罐未開過”嘅雪碧，o係兩位當事人嘅杯側邊(一人一罐)，然後就走咗！飲緊熱水嗰位小姐都唔知發生緊乜嘢事，其他人答佢：『佢話呢隻好飲，介紹比你飲喎！』，飲緊熱水嗰位小姐比嗰侍應激到半死，反晒眼咁話：『唔該晒佢喎』。唉唉唉唉唉！

 

奇人奇事(6)--影相：
呢單唔關酒樓事！係我哋未同BB影相就坐咗落麻雀枱，跟住我先醒起，但鑽媽話只有長輩及親人先會同BB影相，在坐得鑽媽一個擺過滿月酒，所以佢係呢方嘅說話多少都有d權威性，攪到我唔好意思走去影... 最後都冇去影... 好無奈，帶晒相機，之前仲特登义足電o架嘛！唉！

懵人懵事：
是夜要11點幾先散席，散席後我哋係香港仔中心巴士站分道揚鑣，何超搭巴士去銅鑼灣、鑽媽搭巴士去中環、我搭小巴去鰂魚涌。架小巴係數碼港開出，等咗陣見有時間咪睇下幾多分鐘一班車囉，點知越睇越唔對路，原來數碼港嘅尾班車係10:30pm開出o架！Oh No... 即刻跑番轉頭跟何超搭巴士去銅鑼灣，但係佢已經上車坐低咗，架車仲開緊走喇，佢見我唔知乜事，大家用身體語言溝通咗幾下，架巴士就走咗喇！唉！唯有等下一架巴士喇！

 

真係冇諗過滿月酒要咁夜先散水！飲開嗰d都係7點幾8點就開始，9點就一定散水，所以之前冇check清楚尾班車時間囉！