福臨門 Fook Lam Moon

2 July 2011, Saturday

之前去尖沙咀福臨門食過晚飯, 覺得環境同服務都好過灣仔福臨門小小, 所以今日趁假期同埋奶奶大人一齊去尖沙咀福臨門嘆吓一盅兩件...

開咗壺普洱, HONEY話D普洱好順喉, 飲慣茶嘅奶奶大人都讚好飲... 之後再開多一壺鐵觀音就冇平時奶奶屋企飲開果D咁好啦, 所以下次都係飲番普洱好D...

一坐低侍應仲即刻拎2個茶几比我地放手袋, 超細心!!!

蜜汁叉燒酥--全餐最好味!!! 表面係一個合桃酥, 實際係美味足料嘅叉燒酥!!! D叉燒一片片o架!!! 唔係一PAT PAT o架!!! 拉姑極力推介!!!

豉汁蒸排骨--奶奶大人一放入口就話好味... D肉好結實彈牙... 豆豉味比較淡...

爽滑牛肉腸--味道比較普通, 牛肉都足料...

蟹籽蒸燒賣--味道OK冇咩特別... 同埋好似細粒過之前去灣仔福臨門食個次好多...

筍尖鮮蝦餃--蝦餃皮薄到晶瑩剔透... D蝦大大隻, 好新鮮, 味道OK...

香蔴紙包蝦--好香好脆, D蝦仲好大隻好JUICY, 好重蝦味... 好味!!!

荷葉飯(半包)--還是覺得你最好... 食!!! 飯炒得好乾身, 好入味, 好香... 食極都唔嫌...

蛋黃蔴茸--ORDER咗好耐, 仲以為走咗單... 原來係甜品類, 要等我地食晒o野先同其他甜品一齊上枱... 都好細心吓... 個包好重麻蓉味... 不過我地放得太耐先食, 個包已經乾晒, 冇咁好味... 同埋太足料, 所以好滯吓...

杬仁馬拉糕--出奇地好好好食!!! 又唔濕又唔乾, 又唔會死實實, 而且好重蔗糖香味... 必吃!!!

馬仔--好鬆化呀, 仲好重蛋味同芝麻味... 而且一D都唔油膩, YUMMY!!!

呢度環境又寧靜又新淨, 服務又好D, 食物味道同灣仔分店不相伯仲, 所以遠少少過海食都值得...

是次每人消費約$140元
味道： 5 環境： 5 服務： 5 衛生： 5 抵食： 4
###
地址 : 尖沙咀金巴利道53號8號舖1樓
電話 : 2366 0286