「台山四寶」澳門喪食一日遊

期待已久嘅「台山四寶」澳門喪食一日遊, 尋日(2008年3月21日)終於順利完成, 可說是圓滿結束... 「台山四寶」對上一次四個一齊去旅行, 起碼都廿幾卅年前(小學秋季旅行)囉我估, 咁難能可貴嘅旅程, 緊係要第一時間直撃報導, 好, 去片!!!

 

06:45am 上環信德澳門茶餐廳-- 食早餐同埋止暈船浪葯, 哈哈...

07:41am 上船--狂食話梅, 同傾足成程, 加狂笑聲不絕...

09:05am 落船--堆滿人等過關, 好彩開咗條新line比我跑咗埋去, 咁都用咗半個鐘...

10:00am 坐Shuttle去英皇再步行去瑪嘉烈蛋撻--一落船都未回魂已經開始搵食, 哈哈... d葡撻冇香港個d咁甜, 個皮又鬆d, 好味!!! 配埋朱古力咖啡, 呵呵, 第一站順利完成!!! (KaKaMa夜晚返轉頭買咗半打返香港比KaKaBa食, 呵呵, 真係有Heart!!!)...

10:25am 坐Taxi去二龍喉公園--點解得一隻黑熊, 好lonely...

10:45am 坐松山纜車上松山燈塔--世界上最短嘅纜車, 全程1分鐘... 但係排隊排咗半個鐘...

12:30nn 坐Taxi去碼頭再Shuttle去威尼斯人--原來咁細, 幻想破滅...

13:40pm 坐Taxi去氹仔官也街--個司機話唔識公雞(唔通佢唔係澳門人?!), 夾硬車咗我地去小飛象, 吹脹...

14:00pm 公雞--又食o野啦, 哈哈... 全餐最正係d黑olive, 真係估佢唔到...

14:35pm 莫義記大菜糕榴槤雪糕--係公雞食飽飽, 一出門口, 龍媽一支箭走咗去買o黎食, 果然食力非凡... 跟手我地係官也街掃街(不停試食&搶購手信), 爽呀...

15:00pm 坐Bus去新馬路手信街--週圍行下, 參觀咗玫瑰堂, 頂樓個地板好似隨時會塌咁, 超恐怖...

15:35pm 保健牛奶公司--又食, 哈哈哈哈... 呢間出名用農場新鮮鮮奶, 燉蛋燉奶通通一流... 之後係手信街瘋狂試食&搶購手信, 試食到直至再食唔落為止, 好利害...

18:30pm 新帆船餐廳--開頭食個葡國雞覺得好好食, 跟手再食個"辣辣蝦菠菜麵", 嘩, 超好食呀... 個羊脾同三文魚炒飯都好好味... 好過lunch個餐好多...

20:00pm 明記牛雜美食--已經食到飽到嘔, 但係龍媽同貓頭仲可以再隊多串牛雜, 戰鬥力深不見底... 開頭搵唔到仲以為已經執咗, 原來係入夜先開嘅車仔檔...

20:40pm 步行至葡京落雨, 轉Taxi至碼頭

21:10pm 上船--即刻試食hello kitty話梅, 又再傾足成程, 不過由於夜深關係, 只敢細細聲笑...

22:30pm 落船--打道回府, 肯定今晚會瞓到不省人事...